Thailensk fiskisúpa

27. febrúar, 2003

Þetta er svona uppskrift sem maður gerir bara um helgar eða þegar maður hefur nægan tíma því hún er dáldið tímafrek. Hún er reyndar alveg vel þess virði í lokin, alveg mátulega krydduð og ofsalega frískleg (án þess að vera eins og uppþvottalögur á bragðið)! Súpan hentar vel þeim sem hafa glúteinóþol.

Senda uppskrift

Prenta uppskrift

Setja í uppskriftabox

2 ummæli

Þessi uppskrift er:

Án glúteins
Án eggja
Án hneta

Thailensk fiskisúpa

Fyrir 2-3

Innihald

35 g ferskt engifer, afhýtt og saxað mjög smátt
Hálfur stilkur sítrónugras (enska: lemon grass), saxaður smátt
Hálfur rauður chili pipar, fræhreinsaður og saxaður smátt
Hálfur grænn chili pipar, fræhreinsaður og saxaður smátt
1 msk kókosolía
200 ml kókosmjólk
1 gerlaus grænmetisteningur
2 msk fiskisósa (Nam Plah)
1 msk agavesíróp
0,5 msk maísmjöl blandað með 1,5 msk af vatni
250 ml hrein jógúrt
250 g blandaðir sjávarréttir
Safinn af hálfri límónu
Salt (Himalaya eða sjávarsalt)
Svartur pipar eftir smekk
Hálf lúka ferskt coriander, saxað (má sleppa)
Límónusneiðar til skreytingar (má sleppa)

Aðferð

Fjarlægið ystu blöð sítrónugrassins og saxið stilkinn mjög smátt.
Skerið græna og rauða chili piparinn langsum, fræhreinsið og saxið smátt.
Afhýðið engiferið og saxið smátt.
Hitið kókosolíu í potti. Steikið sítrónugras, chili pipar og engifer í um 8-10 mínútur eða þangað til sítrónugrasið og engiferið hefur brúnast og ilmur stígur upp.
Bætið kókosmjólkinni, grænmetisteningnum, agavesírópi og fiskisósunni saman við. Hleypið upp suðu og látið malla í um 5 mínútur. Lækkið þá hitann.
Hrærið maísmjölið saman við jógúrtina og bætið út í pottinn. Hitið varlega og látið ekki sjóða.
Bætið sjávarréttunum við og hitið í 4-5 mínútur.
Á síðustu mínútunni áður en súpan er borin fram, bragðbætið þá súpuna með þá límónusafanum, fersku coriander og salti og pipar.
Berið fram strax.

Gott að hafa í huga

Hægt er að bæta meira grænmeti eins og gulrótum, selleríi og fleira út í ásamt grjónum og núðlum til að gera súpuna matarmeiri.
Einnig er hægt að skipta út fiski og setja kjúklingastrimla í staðinn (notið „hamingjusaman” kjúkling þ.e. free range).
Nota má lax, þorsk, ýsu, steinbít, lúðu, hörpuskel, rækjur o.fl. í réttinn.
Ef kókosolían er hörð má stinga krukkunni í heitt vatn í nokkrar mínútur þar til hún verður fljótandi.
Nota má aðra olíu en kókosolíu, t.d. vínberjakjarnaolíu eða repjuolíu.
Gerlausir grænmetisteningar fást í heilsubúðum og stærri matvöruverslunum.
Ef þið eruð ekki viðkvæm fyrir geri getið þið notað venjulega, lífrænt framleidda grænmetisteninga.
Ef afgangur er af kókosmjólkinni má frysta hana í ísmolabox og nota síðar, t.d. í svona súpur.