Taco með sojahakki
21. mars, 2003
Ég notaði sojakjötshakk í þennan rétt og það var mjög gott. Maður þarf bara að vera búinn að láta hakkið liggja í kryddlegi áður en maður útbýr réttinn (eins og þarf alltaf með sojakjöt). Það er best að láta hakkið liggja í grænmetiskrafti og svo einhverri sterkri mexikanskri sósu (sem þið ættuð að kaupa lífrænt framleidda í heilsubúð). Best er að leyfa hakkinu að marinerast í nokkrar klukkustundir (en 30 mínútur eru nægilegar).  Ég kaupi tacoskeljarnar einnig í heilsubúðum.
Ég bý til mitt eigið guacamole og salsa en ef þið búið erlendis (t.d. London) er oft hægt að kaupa hvoru tveggja í heilsubúðum. Gott er að undirbúa guacamole og salsa deginum áður til að flýta fyrir sér.
Þessi uppskrift er:
- Án glúteins
- Án eggja
- Án hneta
Þessa uppskrift er auðvelt að gera:
- Án mjólkur
- Vegan (fyrir jurtaætur)
Taco með sojahakki
Fyrir 3-4
Innihald
- 150 g sojakjöt, hakkað (úr heilsubúð)
- Nægilega mikið sjóðandi heitt vatn til að þekja sojakjötið
- 200 g mexikönsk sósa (úr heilsubúð)
- 1 gerlaus grænmetisteningur
- Smá klípa svartur pipar af svörtum pipar
- 12 tacoskeljar (úr heilsubúð)
- 6 sveppir, sneiddir þunnt
- 2 niðursoðnir jalapeno pipar, sneiddir þunnt
- 10 svartar ólífur, sneiddar
- Nokkur blöð Lambhagasalat eða annað blaðsalat
- 100 ml 5% sýrður rjómi (án gelatíns, frá Mjólku)
- 150 ml guacamole (heimatilbúið eða úr heilsubúð)
- 150 ml salsasósa (heimatilbúið eða úr heilsubúð)
- 100 g magur ostur, rifinn
- Svartur pipar eftir smekk
Aðferð
- Látið sojakjötið liggja í grænmetisteningi, mexikönsku sósunni og sjóðandi heitu vatni í nokkrar klukkustundir þannig að sojakjötið nái að draga vökva vel í sig).
- Sneiðið sveppina, jalapeno piparinn og ólífurnar. Setjið allt í sér skálar
- Rífið ostinn á rifjárni og setjið í skál.
- Steikið sveppina á stórri pönnu, upp úr svolitlu vatni og kryddið með pipar. Setjið í litla skál.
- Hreinsið salatblöðin og rífið smátt og setjið í litla skál.
- Setjið guacamole, salsasósu og sýrða rjómann í sér skálar.
- Setjið sojakjötið ásamt auka vökva ef einhver er á pönnuna og hitið vel eða þangað til mesti vökvinn er gufaður upp. Kryddið með pipar ef ykkur finnst þurfa.
- Hitið tacoskeljarnar í ofni samkvæmt leiðbeiningum (alls ekki steikja þær því þær innihalda nógu mikla fitu fyrir).
- Takið skeljarnar úr ofninum og setjið á stóran disk. Raðið skálunum með tilbúna hráefninu í kringum diskinn þannig að hver og einn geti raðað í sínar skeljar.
Gott að hafa í huga
- Það er skemmtilegast að nota litríkar skálar undir allt hráefnið en auðvitað ekki nauðsynlegt.
- Sojahakk er hakkað sojakjöt (fæst stundum dökkt að lit en oft stundum einungis ljóst). Kaupið óerfðabreytt sojakjöt (non-GMO) úr heilsubúð.
- Tacoskeljarnar ættu að fást í heilsubúðum. Þær eiga að vera lífrænt framleiddar og án MSG og aukaefna.
- Nota má AB mjólk, hreina jógúrt eða sojajógúrt í staðinn fyrir sýrða rjómann.
- Nota má sojaost í staðinn fyrir venjulega ostinn.
- Kaupið salsasósu, guacamole og mexikanska sósu í heilsubúð, þær sem fást í matvöruverslunum (þ.e. ekki lífrænt framleiddar) eru oft bölvað drasl.
- Gerlausir grænmetisteningar fást í heilsubúðum og stærri matvöruverslunum.
- Ef þið eruð ekki viðkvæm fyrir geri getið þið notað venjulega, lífrænt framleidda grænmetisteninga.
Tengdar uppskriftir
© CafeSigrun 2024