PiparkökurPiparkökur
28. nóvember, 2009
Búa má til piparkökukarla (og konur) og alls kyns fleiri skemmtilegar fígúrur úr þessu deigi. Einnig hentar þetta deig fyrir lítil piparkökuhús. Piparkökurnar eru ekki mjög mikið kryddaðar svo þær henta vel fyrir t.d. börn. Ef þið viljið meira kryddbragð, setjið þá 1 tsk af negul og jafnvel smá klípu af múskati út í. Ég nota líka aðeins meiri kókosolíu hér en venjulega en annars er ómögulegt að fá piparkökurnar til að liggja flatar... Segja má að piparkökufólkið sé með uppreisn ef ekki er næg fitan í þeim!!!
Senda uppskrift
Prenta uppskrift
Setja í uppskriftabox
8 ummæliÞessi uppskrift er:
- Án mjólkur
- Án eggja
- Án hneta
- Vegan
Piparkökur
Gerir um 40 piparkökur
Innihald
- 185 g spelti
- 1 tsk bökunarsódi
- 3 tsk kanill
- 0.25 tsk múskat (enska; nutmeg, má sleppa
- 6 msk kókosolía
- 115 ml agavesíróp
- 4 msk rapadura hrásykur (eða annar hrásykur)
Aðferð
- Í stóra skál skuluð þið sigta saman bökunarsóda, kanil og spelti. Hrærið vel.
- Í aðra skál skuluð þið hræra saman rapadura hrásykri, agavesírópi og kókosolíu. Hellið út í stóru skálina og hrærið öllu vel saman.
- Hnoðið deigið í smá stund til að allt blandist vel saman. Pakkið deiginu inn í plast og kælið í 30 mínútur eða lengur í ísskápnum.
- Skiptið deiginu í nokkra búta og fletjið með kökukefli eða stórri glerflösku. Deigið ætti að vera um 1 millimetri að þykkt.
- Ef deigið festist við borð eða kökukefli er ágætt að dreifa svolitlu spelti yfir borðið, deigið og kökukeflið.
- Skerið út deigið með t.d. kökuskurðarmótum (stjörnur, jólatré, piparkökukarla og konur, hjörtu o.fl.). Gott er að miða við um 5-7 sm í þvermál.
- Klæðið bökunarplötu með bökunarpappír og raðið kökunum á plötuna.
- Bakið við 180°C í um 10-12 mínútur eða þangað til kökurnar eru orðnar gullnar. Þær eru ekki grjótharðar á þessum tímapunkti en munu kólna og harðna.
Gott að hafa í huga
- Ef kókosolían er hörð má stinga krukkunni í heitt vatn í nokkrar mínútur þar til hún verður fljótandi.
- Ef kökurnar eru ekki harðar þegar þær hafa kólnað má baka þær í um 5 mínútur til viðbótar. Ef þær eru þykkar þurfa þær aðeins lengri tíma en ella.
Tengdar uppskriftir
© CafeSigrun 2012
Ofnæmi/Óþol
Bloggið
Póstlistinn
Skráðu þig á póstlistann og fáðu nýjustu uppskriftirnar sendar í pósti
Ummæli um uppskriftina
28. nóv. 2010
sæl Sigrún mig langaði að spyrjast fyrir um piparkökurnar. Það stóð ekki hvaða hita þú notar og eru þær mjög harðar? flott síða hjá þér.Ég hef notað margar uppskriftir frá þér. Takk fyrir Laura Hidur
28. nóv. 2010
Sæl Laura
Mér að kenna, ég gleymdi að setja hitann með. Ég baka þær við 180°C. Þær verða passlega harðar þ.e. ekki of mjúkar en ekki þannig að þær séu óþægilega harðar. Eða þær eiga að vera svoleiðis :) Ef þær verða of harða er hitinn kannski aðeins of hár eða þær bakast aðeins of lengi. Yfirleitt duga 10 mínútur en stundum eru 8 mínútur nóg ef kökurnar eru ekki mjög þykkar.
Vona að þetta hjálpi.
Kv.
Sigrún
07. des. 2010
komu verulega á óvart, minn 11 ára hefur ekki borðað piparkökurnar sem hann og vinur hans hafa skreytt hingað til, nú er ég ekki viss um að þær verði til nógu lengi svo hægt sé að skreyta þær ! :) Á örugglega eftir að baka aðra uppskrift fyrir jól, þá ætla ég að prófa að setja smá neglul. Takk fyrir okkur. kv. Kristín
08. des. 2010
Reglulega gaman að heyra Kristín. Mér þykir sérstaklega vænt um það þegar börnunum líkar uppskriftirnar mínar vel því þau eru jú hörðustu dómararnir!!
29. nóv. 2011
Bestu piparkökur sem ég hef bakað!! Geri örugglega aðra umferð fyrir jól :)
30. nóv. 2011
Takk Þóra, gaman að heyra :) Njótið vel :)
02. des. 2011
Er hægt mað sleppa sykrinum eða setja eitthvað annað í staðinn ? :)
02. des. 2011
Hef ekki prófað...gætir athugað með Stevia í staðinn fyrir hrásykurinn en veit ekki hvernig það kemur út, það mun breyta áferðinni eitthvað.
Skrifa ný ummæli