Mulligatawny súpa (indversk grænmetissúpa)

Einu sinni pantaði ég Mulligatawny súpu á indverskum veitingastað á Brick Lane, London. Brick Lane er þar sem alvöru indverskur matur fæst því þar eru margar kynslóðir Indverja búnar að hreiðra um sig. Meira að segja eru götunöfnin á Urdu eða Hindi eða álíka. Maturinn sem við fengum var mjög góður en munnurinn á mér LOGAÐI í nokkra daga á eftir, ég er nokkuð viss um að hafa drepið nokkur hundruð bragðlauka í munninum. Súpan var svívirðilega sterkt. Þegar ég bað þjóninn um vatn eða slökkvitæki glotti hann út í annað. 

Þessi súpa er aftur á móti ensk-indversk og koma áhrifin frá tveimur álfum (þ.e. Evrópu og Indlandi). Mullitgatawny þýðir í raun “piprað vatn” (Millagu þýðir pipar og Tahnni þýðir vatn) en ekki láta það rugla ykkur því það er mjög lítill pipar í súpunni og þrátt fyrir að innihalda 2 græna chili pipar þá er hún alls, alls ekki sterk. Súpurnar eru mismunandi eftir svæðum og sumir setja í hana kjúkling eða hrísgrjón á meðan aðrir setja í hana turmeric og grænmeti eins og í uppskriftinni hér að neðan. Súpan inniheldur kannski skrítna samsetningu eins og epli, kartöflur og kókosmjólk en verið óhrædd við að prófa hana. Hún er mild, mjög seðjandi og hentar vel fyrir krakka þar sem hún er full af grænmeti (sem þau sjá ekki því súpan er maukuð) og er pínulítið sæt. Stundum er sykur settur í súpuna en ég hef notað epli í staðinn sem kemur mjög vel út. Uppskriftin er nokkuð stór svo hafið það í huga þegar þið búið hana til. Súpan hentar vel fyrir þá sem hafa glúteinóþol og mjólkuróþol. Ef þið borðið kjöt og eigið afganga af því (t.d. lambakjöt) getið þið bætt þeim út í til að gera súpuna matarmeiri.

Athugið að best er að nota matvinnsluvél, blandara eða töfrasprota til að mauka súpuna.