Kókos- og límónusúpa

27. febrúar, 2003

Þessi súpa er svolítið „öðruvísi súpa”, krydduð en ansi góð og sérlega drjúg. Kókosmjólkin, engiferið og límónan passa vel saman og gefa ferskt bragð með thailensku ívafi. Afskaplega sniðug súpa ef maður á smávegis af tofu, rækjum, kjúklingi eða fiski til að henda út í en stendur þó vel fyrir sínu sem seðjandi grænmetissúpa. Mér finnst mjög mikilvægt með súpur sem innihalda sítrónugras og límónur að þær bragðist ekki eins og uppþvottalögur og að gott jafnvægi sé á milli súra, sæta og sterka bragðsins. Þið getið lagað hlutföllin að ykkar smekk en ég er hrifnari af aðeins sætari súpum en sterkum.

Súpan hentar þeim sem hafa mjólkuróþol og glúteinóþol. Súpan hentar einnig vel til frystingar (en betra að bíða með að setja kínverska hvítkálið út í fyrr en súpan er hituð upp).

Til að gera kryddgrunninn er gott að nota matvinnsluvél eða töfrasprota en einnig má saxa hráefnið afar smátt.

Senda uppskrift

Prenta uppskrift

Setja í uppskriftabox

Frískleg og bragðgóð súpa

0 ummæli

Þessi uppskrift er:

Án glúteins
Án mjólkur
Án eggja
Án hneta
Vegan

Kókos- og límónusúpa

Fyrir 2-3

Innihald

Hálfur laukur, saxaður gróft
5 g ferskt engifer, afhýtt og saxað smátt
Hálfur grænn chili pipar, fræhreinsaður og saxaður gróft
2 hvítlauksrif, söxuð gróft
2 stilkar sítrónugras (enska: lemon grass), ystu blöð fjarlægð, saxaðir smátt
100 g pak choi (kínverskt hvítkál), saxað gróft
Fjórðungur úr rauðri papriku, sneidd í þunnar sneiðar
1 msk kókosolía
200 ml vatn
1 msk agavesíróp
1 gerlaus grænmetisteningur
400 ml kókosmjólk
175 g baunaspírur
Safi af hálfri sítrónu
Safi af hálfri límónu
Ein lúka fersk coriander lauf
Smá klípa salt (Himalaya eða sjávarsalt)
Svartur pipar eftir smekk

Aðferð

Afhýðið hvítlauk og lauk. Saxið gróft.
Skerið chili piparinn langsum og fræhreinsið. Saxið gróft.
Skerið paprikuna langsum og fræhreinsið. Skerið í þunnar sneiðar.
Afhýðið engiferið og saxið smátt.
Fjarlægið ystu blöðin af sítrónugrasinu og saxið smátt.
Hreinsið kínverska hvítkálið og saxið gróft.
Setjið hvítlauk, lauk, engifer, chili pipar og sítrónugras í matvinnsluvél (eða notið töfrasprota) og maukið í nokkrar sekúndur eða þangað til vel blandað saman.
Hitið kókosolíuna í potti og setjið maukið í pottinn. Hitið varlega í um 5 mínútur.
Bætið við kókosmjólk, agavesírópi, vatni, grænmetisteningi, baunaspírum, papriku og kínverska hvítkálinu. Hitið varlega í 10 mínútur eða þangað til grænmetið er orðið meyrt (ennþá aðeins stökkt) en ekki mjúkt.
Bætið við sítrónu- og límónusafanum og corianderlaufunum og hitið að suðu.
Kryddið með salti og pipar og berið fram í djúpum skálum.

Gott að hafa í huga

Hægt er að bæta út í súpuna afgangs sjávarfangi eins og, lúðubitum, humri, hörpuskel eða rækjum til að gera hana matarmeiri. Einnig má nota kjúkling (notið „hamingjusaman” kjúkling)..
Einnig er hægt að bæta meira grænmeti út í eins og smátt skorinni gulri og rauðri papriku, núðlum eða smávegis af soðnum grjónum.
Pak choi kallast líka líka kallað hakusai, bai cai, pak choi eða kínverkst hvítkál. Fæst oft í stærri matvöruverslunum eða verslunum sem sérhæfa sig í austurlenskum matvörum.
Ef kókosolían er hörð má stinga krukkunni í heitt vatn í nokkrar mínútur þar til hún verður fljótandi.
Nota má aðra olíu en kókosolíu, t.d. vínberjakjarnaolíu eða repjuolíu.
Gerlausir grænmetisteningar fást í heilsubúðum og stærri matvöruverslunum.
Ef þið eruð ekki viðkvæm fyrir geri getið þið notað venjulega, lífrænt framleidda grænmetisteninga.
Ef afgangur er af kókosmjólkinni má frysta hana í ísmolabox og nota síðar, t.d. í svona súpur.