Hummus

3. mars, 2003

Við fáum okkur stundum hummus og nýbakað brauð, með fullt af grænmeti og það er ofsalega góð máltíð, maður verður alveg pakksaddur. Ég nota minna af tahini (sesammauki) og ólífuolíu en á að gera. Það má alveg vera meira af tahini en það bætir hellings fitu við (sesammauk er mjög hátt í fitu en að sama skapi er það holl fita). Hér fyrir neðan er sú uppskrift af hummus sem ég nota hvað mest en hún er samsuða úr nokkrum, það tók mig svolítinn tíma að fikra mig áfram með samsetninguna þannig að ég yrði ánægð með hana. Best er að nota matvinnsluvél til að búa til hummus.

Athugið að uppskriftin er merkt sem án hneta en hún inniheldur tahini sem er unnið úr sesamfræjum sem sumir hafa ofnæmi fyrir.

Senda uppskrift   Prenta uppskrift   Setja í uppskriftabox

Hummus, passar með ótrúlega mörgu
6 ummæli 6 ummæli

Þessi uppskrift er:

  • Án glúteins
  • Án mjólkur
  • Án eggja
  • Án hneta en með fræjum
  • Án hneta
  • Vegan

Hummus

Einn skammtur fyrir 3-4

Innihald

  • 1 dós (240 g án vökvans) soðnar/niðursoðnar kjúklingabaunir, hellið vatninu af
  • 2 msk tahini (sesammauk)
  • 1,5 msk sítrónusafi
  • 0,25 tsk cumin (ekki kúmen)
  • Smá klípa cayennepipar eða paprika
  • 1-2 stór hvítlauksrif, afhýdd og söxuð smátt
  • 2 msk eða meira af vatni eða sojamjólk (má sleppa)
  • 1-2 msk ólífuolía (sumir nota meiri ólífuolíu)
  • 1 tsk tamarisósa
  • Svartur pipar eftir smekk

Aðferð

  1. Ef maður hefur nægan tíma er gott að losa hýðið af niðursoðnu kjúklingabaununum. Mér finnst bragðið verða betra en þetta er algjörlega smekksatriði og ekki nauðsynlegt að gera. Til að losa hýðið af kjúklingabaunum er gott að leggja þær í um 5 mínútur í skál með vatni og nudda þær varlega með fingrunum. Við það flýtur hýðið upp á yfirborðið. Það þarf ekki að gera þetta en er samt mjög gott, mér finnst hummusinn verða betri svoleiðis. Ekki hugsa mikið um notaðar augnlinsur meðan þið gerið þetta, maður gæti misst matarlystina!!
  2. Hellið öllu vatni af kjúklingabaununum og setjið þær í matvinnsluvél. Maukið í 10 sekúndur.
  3. Afhýðið hvítlaukinn, saxið hann smátt/pressið hann og bætið honum út í ásamt cayennepipar, cumin, sítrónusafa, tamarisósu og tahini.
  4. Maukið allt saman í um 30 sekúndur eða skemur ef þið viljið grófari áferð.
  5. Kryddið með meiri tamarisósu og svörtum pipar. Einnig má bæta aðeins við af tahini ef þið viljið meira bragð af því.
  6. Ef þið viljið hummusinn aðeins mýkri, má bæta vatni eða sojamjólk út í hummusinn.
  7. Berið fram í skál og dreifið smá klípu af cayenne pipar yfir. Einnig er gott að setja 1 tsk af ólífuolíu í miðjuna á hummusinum (búið til smá dæld í hummusinn og hellið ofan í).

Gott að hafa í huga

  • Berið fram með grófu nýbökuðu brauði, eða grófu speltbrauði og fullt af grænmeti; gúrkum, tómötum, maískorni, papriku, sveppum, jöklakáli osfrv.
  • Hummus er æðislegur innan í vefjur.
  • Það er gott að setja grænmeti, niðurskorið á diska svo að hver og einn geti raðað í sitt brauð eða í sína vefju.
  • Það er líka æðislega gott að rista pítubrauð mjög vel (eða grilla í ofni) og brjóta svo í bita og nota til að dýfa í hummusinn! Athugið þó að pítubrauð inniheldur ger.
  • Hummus passar einnig vel með hrískökum, hrökkbrauði, flatkökum og svo mætti lengi telja.
  • Tahini (sesammauk) fæst í heilsubúðum og heilsudeildum matvöruverslanna. Ég nota yfirleitt dökkt tahini en einnig má nota ljóst (ekki eins hollt og það dökka).
Flokkar Hitt og þetta, Á ávallt við, Páskar / veislur
Senda á facebook   Senda uppskriftina á twitter   Pin It  
Senda uppskrift   Prenta uppskrift   Setja í uppskriftabox
© CafeSigrun 2012

Ummæli um uppskriftina

Sara Björg
06. apr. 2011

Hæ hæ
Takk fyrir frábæra síðu, ég er búin að læra smátt og smátt inn á hollt matarræði með þinni hjálp og mér finnst uppskirftirnar þínar allveg æðislega góðar, miklu betri en óholli maturinn :)

Vildi bara spyrja þig hvort maður mætti frysta hummus?

sigrun
07. apr. 2011

Takk Sara :)

Sko....ef þú frystir hann fyrir lengri tíma en viku myndi ég mæla með því að mauka hvítlaukinn sér og bæta honum út í eftir að hummusinn er þiðinn. Mér finnst ekki gott að frysta hvítlauk til lengri tíma því það er eins og komi þráabragð af honum. Öðru máli gegnir um 'eldaðan' hvítlauk.

Vona að þetta hafi hjálpað.

Elísabet Thoroddsen
19. feb. 2012

Sæl og takk fyrir góðan vef!

Nú var ég að enda við að gera einmitt þessa uppskrift, sem er bæ ðe vei geggjuð. Ég ætla meðal annars að nota þetta sem nesti í vinnuna. Hvað geymist svona hummus lengi í ísskápnum?

Þúsund þakkir enn og aftur fyrir góðan vef!

sigrun
20. feb. 2012

Sæl og takk :)

Ég hef geymt hummus í viku í ísskápnum og það gæti vel verið að hann geymist lengur....Hann hefur aldrei náð svo langt (eða ég ekki gert meira en tvöfalda uppskrift) :)

710foss
06. apr. 2012

Takk fyrir góða síðu hefur hjálpað mér mjög mikið.Er hægt að nota annað en tahini í hummus ég virðist ekki þola sesomfræ mjög vel.Kveðja Ásta

sigrun
06. apr. 2012

Sæl Ásta. Tahini er dálítið stór hluti af hummusinum þ.e. gefur honum þetta einkennandi bragð og fyllingu. Þú getur sleppt því en það vantar þá svolítið upp á bragð og áferð. Bættu aðeins við af olíunni til að fá meiri fyllingu.

Skrifa ný ummæli

Vinsamlegast athugið að reiti merkta með * þarf að fylla út.
 
Innihald þessa svæðis verður ekki sýnilegt almenningi.
Þessi spurning hér að neðan er til að varna því að spamvélar geti sett inn sjálfvirkar færslur.
Vinsamlegast leggðu saman tölurnar og skrifaðu niðurstöðurnar. T.d. fyrir einn plús þrír, skaltu skrifa 4.
níu plús einn eru