Hjónabandssælan hennar mömmu

Mamma mín heitin var afbragðs hjónabandssælubakari. Hún bakaði gjarnan á haustin og gaf til vina og ættingja sem fóru lukkulegir heim með hjónabandssælu undir arminn. Einn nágranni okkar var gullsmiður og hann útbjó verðlaunapening handa mömmu sem hann letraði á: „Fyrsta sæti í hjónabandssælubakstri". Verðlaunapeningurinn hékk uppi og hróður mömmu barst enn víðar. Sælan er mjög tengd minningum um mömmu og svo mikið í reynd að í erfidrykkju mömmu þegar hún lést árið 2016, útbjó Smári bróðir minn hjónabandssælu eftir uppskrift hennar. Það er kannski ekki hefðbundið að bjóða upp á þessa tegund köku í erfidrykkjum en það átti einkar vel við í þessu tilviki. Uppskriftin mín er örlítið breytt því ég nota ekki smjör og notaði erythritol á móti hrásykri. Einnig nota ég jarðarberjasultu á móti rabarbaranum. Engu að síður er grunnurinn kominn frá mömmu sem hún notaði alla tíð. 

Athugið að í upprunalegu uppskriftinni eru egg en sælan er nánast alveg eins þó maður sleppi því og noti möluð chiafræ í staðinn.