Haframjölsterta

5. mars, 2003

Þessi haframjölsterta er nú ekki eins klessulega óholl og venjuleg haframjölsterta en er engu að síður alveg prýðileg. Eina haframjölstertan sem ég hef haft kynni af í gegnum tíðina var bökuð af Jóhannesi manninum mínum þegar hann var unglingur (við þekktumst þegar við vorum unglingar). Hann bakaði hana fyrir eitthvað afmæli og það var svo mikill sykur í henni og svo mikið síróp að hún varð nánast fljótandi. Við horfðum á hana með skelfingu hristast þegar hún var borin frá eldhúsinu yfir á kökuborðið. Það fengu líka allir gestirnir niðurgang. Jóhannes gat ekki hugsað sér haframjölstertu í mörg ár en samþykkti að smakka þessa og var bara sáttur. Hann fékk a.m.k. engan niðurgang af henni.

Athugið að þið þurfið tvö 22 sm kringlótt smelluform

Senda uppskrift

Prenta uppskrift

Setja í uppskriftabox

0 ummæli

Þessi uppskrift er:

Án mjólkur
Án hneta

Haframjölsterta

Gerir 1 köku

Innihald

Botn

200 g döðlur, saxaðar gróft
200 ml appelsínusafi
250 g spelti
2 tsk vínsteinslyftiduft
200 g haframjöl
2 msk kókosolía
130 g rapadura hrásykur (eða annar hrásykur)
350 ml lífrænt framleiddur barnamatur án sykurs; epla-, peru-, eða aprikósumauk
2 egg
140 g sulta (t.d. hindberja-, jarðarberja-, eða blönduð) án viðbætts sykurs

Súkkulaðikrem

3-4 msk kakó eða carob
1 banani, mjög vel þroskaður
1 msk sojamjólk
2 msk vanilludropar (úr heilsubúð)
4 msk agavesíróp
1 msk kaffi (má sleppa)
2 msk kartöflumjöl (ef þarf)

Aðferð

Byrjið á kreminu:
Setjið banana, sojamjólk, vanilludropa, kaffi og agavesíróp í matvinnsluvél eða blandara. Blandið í 10 sekúndur. Bætið kakóinu út í og blandið áfram í 5 sekúndur.
Kælið kremið í klukkustund í ísskáp.
Útbúið botninn á meðan kremið kólnar:
Saxið döðlurnar gróft og setjið í pott ásamt appelsínusafanum. Sjóðið döðlurnar í um 20 mínútur eða þangað til nokkuð maukaðar. Kælið og setjið til hliðar.
Sigtið saman í stóra skál spelti og vínsteinslyftiduft. Bætið haframjölinu saman við og hrærið vel.
Í aðra skál skuluð þið blanda saman eggjum, kókosolíu, rapadura hrásykri og barnamat. Hrærið vel og hellið út í stóru skálina.
Klæðið 2 x 22 sm kringlótt smelluform með bökunarpappír. Skiptið deiginu jafnt á milli formanna (þannig að þið fáið botn og lok) og gætið þess að deigið sé jafnt í formunum (ekki mis hæðótt).
Bakið við 180°C í um 30 mínútur.
Kælið.
Hellið vökva, ef einhver er, af döðlumaukinu og smyrjið því á botninn. Smyrjið sultunni svo ofan á döðlumaukið og setjið svo lokið ofan á.
Takið súkkulaðikremið úr ísskápnum og smyrjið því á kökuna og á hliðarnar.

Gott að hafa í huga

Passið að deigið sjálft verði ekki of þurrt. Bætið meiri vökva við deigið ef ykkur finnst það þurrt.
Ef ykkur finnst kakan of þurr þegar hún kemur úr ofninum, látið hana þá standa tilbúna á borðinu í nokkrar klukkustundir áður en hún er borðuð. Kakan mun draga í sig vökvann af döðlumaukinu, sultunni og kreminu.
Ég nota gjarnan hindberjasultuna frá St. Dalfour eða jarðarberjasultuna frá Himneskri hollustu. Nota má aðrar sultur án viðbætts sykurs. Mjög góðar sultur fást í heilsubúðum.
Ef kókosolían er hörð má stinga krukkunni í heitt vatn í nokkrar mínútur þar til hún verður fljótandi.
Ég nota Hipp Organic, Organix eða Holle barnamat. Þessi merki eiga það sameiginlegt að vera lífrænt framleidd og eru ekki með viðbættum sykri.
Í staðinn fyrir barnamat má nota eplamauk (enska: Apple sauce) úr heilsubúð eða heilsudeildum matvöruverslana.
Ef afgangur er af barnamatnum má frysta hann í ísmolabox og nota í drykk síðar (smoothie).
Nota má hreint hlynsíróp (enska: maple syrup) í staðinn fyrir agevesíróp.
Notið hamingjuegg ef þið mögulega getið.