Gulrótarkakan hans AlbertsGulrótarkakan hans Alberts
Þessa uppskrift sendi notandi vefjarins, Albert Eiríksson mér og mælti með að ég prófaði. Sem ég gerði daginn eftir og sé ekki eftir því. Kakan var svona líka ljómandi góð og ekki er verra að hún er hráfæðiskaka og algjörlega stútfull af vítamínum, próteini, hollri fitu og trefjum.
Athugið að matvinnsluvél þarf til að útbúa uppskriftina og gott er að nota kökuform en ekki nauðsynlegt. Athugið einnig að leggja þarf cashewhneturnar í bleyti í rúma klukkustund áður en þær eru maukaðar. Texti í hornklofa er minn.
Á myndina mína vantar súkkulaðispæni og sítrónubörk sem á að vera í uppskriftinni. Ég var of æst þegar ég var að mynda kökuna og gleymdi að setja hvoru tveggja ofan á. Athugið að til að kakan geti talist hráfæðiskaka þyrftuð þið annað hvort að búa til ykkar eigið súkkulaði, eða kaupa hrátt súkkulaði í heilsubúð (eða nota kakónibbur).
Senda uppskrift
Prenta uppskrift
Setja í uppskriftabox
Dásamlega (og hráa) gulrótarkakan hans Alberts
10 ummæliÞessi uppskrift er:
- Án glúteins
- Án mjólkur
- Án eggja
- Vegan
- Hráfæði
Gulrótarkakan hans Alberts
Innihald
Botn
- 350 g gulrætur, afhýddar og rifnar á rifjárni
- 150 g döðlur, saxaðar gróft
- 130 g aprikósur, saxaðar gróft
- 80 g rúsínur
- 100 g valhnetur [ég notaði helming valhnetur, helming pecan hnetur]
- 125 g kókosmjöl
- 1 msk kókosolía
- 3 msk vatn
- 0,5 tsk salt
- 0,5 tsk múskat (enska: nutmeg)
- 0,5 tsk allrahanda
- Rifinn sítrónubörkur [til að skreyta með]
- Dökkt, súkkulaði, rifið á rifjárni [til að skreyta með]
Cashew krem
- 200 g cashew hnetur
- 2 tsk agavesíróp eða [acacia] hunang
- 1 msk kókosolía
- 3 tsk vatn
- Klípa af salti [Himalaya eða sjávarsalt]
Aðferð
- Byrjið á kreminu:
- Leggið hneturnar í bleyti í 1-2 klukkustundir.
- Hellið vatninu af hnetunum og setjið þær í matvinnsluvél. Blandið í um 10 sekúndur eða þangað til vel maukaðar.
- Skafið hliðar matvinnsluvélarinnar og bætið hunangi eða agavesírópi út í, ásamt kókosolíu, vatni og salti. Blandið í um 5 sekúndur.
- Setjið kremið til hliðar.
- Undirbúið nú kökuna:
- Afhýðið gulræturnar og rífið meðal gróft á rifjárni.
- Setjið hneturnar í matvinnsluvél og blandið í um 5 sekúndur eða þangað til smátt saxaðar. Setjið í stóra skál.
- Saxið döðlur og aprikósur gróft og setjið í matvinnsluvél ásamt rúsínunum, kókosolíu og vatni. Blandið í um 20 sekúndur eða þangað til ávextirnir eru orðnir nokkuð vel saxaðir en án þess að vera maukaðir. Setjið í stóru skálina.
- Bætið rifnu gulrótunum út í skálina ásamt kókosmjöli, salti, múskati og allrahanda. Hrærið mjög vel.
- Takið til stóran disk/kökudisk og setjið gulrótarblönduna ofan á diskinn. Mótið köku með stórri sleikju (eða höndunum). Einnig má nota form með bökunarpappír í botninum. Þykktinni ráðið þið.
- Smyrjið kreminu á kökuna og geymið í ísskáp í um klukkustund.
- Skreytið með góðu, dökku súkkulaði (rifnu á rifjárni), sítrónuberki og jafnvel berjum.
Gott að hafa í huga
- Nota má pecan hnetur í staðinn fyrir valhnetur eða á móti þeim.
- Nota má carob í staðinn fyrir súkkulaði en bragðið verður auðvitað ekki eins.
- Ef kókosolían er hörð má stinga krukkunni í heitt vatn í nokkrar mínútur þar til hún verður fljótandi.
- Nota má hreint hlynsíróp (enska: maple syrup) í staðinn fyrir agevesíróp.
Ummæli um uppskriftina
27. sep. 2011
Hljómar girnilega en hvað get ég notað í staðinn fyrir hnetur?
27. sep. 2011
Ég myndi halda að það væri mjög erfitt að gera kökuna án hneta :( Möguleiki að nota tofu en áferðin verður allt önnur auðvitað.
29. mar. 2013
Þessi kaka litur rosalega vel út! En hvað er þetta allrahanda sem a að vera i kökunni?
29. mar. 2013
Allrahanda (negulpipar) er krydd sem fæst í flestum stærri matvöruverslunum, minnir að það heiti AllSpice á ensku, líka callað Jamaica Pepper :)
20. sep. 2013
Breytir einhverju hvort það séu ferskar eða þurrkaðar apríkósur? :)
02. maí. 2014
Sæl, jú það breytir reyndar öllu :) Kakan verður ekki nægilega þétt ef þú notar ferskar aprikósur og þess vegna þarf að nota þurrkaðar.
02. maí. 2014
Takk fyrir að deila þessari uppskrift með okkur, ég hlakka til að prufa hana :) Ég held að svona allrahanda krydd fáist ekki í Noregi (þar sem ég bý). Veistu hvort það passar að nota negul eða eitthvað annað krydd í staðinn?
02. maí. 2014
Jú notaðu um 1/4 tsk negul og 1/4 tsk múskat í staðinn (eða 1 tsk kanil) :)
03. maí. 2014
Takk fyrir svarið Sigrún. Gerði þessa í gær og hún er alveg rosalega góð :) Ég átti reyndar ekki apríkósur svo ég notaði meiri döðlur og rúsínur í staðinn og það heppnaðist vel :-)
03. maí. 2014
Gaman að heyra Ásta og takk fyrir að deila með okkur :)