Bloggið

Ég var sko í búðinni í hádeginu, í Tesco. Ég var að setja smápening í veskið mitt þegar 1 penní (ein króna) datt í gólfið. Af því að ég er svo "rík" (eða aðallega af því það er vont að beygja hnéð) þá ákvað ég (sparsamasta manneskja í heimi svona yfirleitt allavega) að taka ekki peninginn upp (ég gef alltaf brúnu peningina (krónurnar) hvort eð er til þeirra sem þurfa meira á honum að halda en ég). Þegar ég var að labba út þá kemur ungur, myndarlegur maður hlaupandi á eftir mér og tekur í hægri lófann á mér. Hann horfði beint í augun á mér og sagði: "Þetta er lukkupeningurinn þinn.....þú VERÐUR að passa hann því hann á eftir að færa þér mikla lukku". Hmmmmmm. Ég labbaði á Starbucks, keypti mér kaffi og labbaði svo í vinnuna. Varð ekki vör við neina sérstaka lukku sko. Fékk reyndar kaffiprufu á Starbucks og fann þroskaða banana í sjoppunni sem mig vantaði en tel það enga mjög sérstaka lukku :(Vogaði mér ekki að taka peninginn úr vasanum svo hann er þar enn þá, bíður bara eftir að geta fært mér rosalega lukku. Ég verð brjáluð ef strákurinn hefur verið að ljúga að mér. Hefði samt verið áhrifameira ef þetta hefði verði gömul, hrukkót, kínversk kona með pírð augu :( Æi geymi hann í nokkra daga allavega. Hefði annars mátt koma gerast FYRIR innbrotið sko, hefði verið allt í lagi.

Uss uss hvað er langt síðan ég bloggaði.

Það hefur nú ekki mikið markvert gerst svo sem í rigningunni. Það er búið að rigna á hverjum degi síðan við komum. Hmmm ætli sé ekki beint samband við 30% jeppaumferð um Laugaveginn (sko Laugaveginn í Reykjavík). Held það nú, þetta eru bara gróðurhúsáhrifin sko.

Ég er búin að vera svo utan við mig síðustu daga að það hálfa væri nóg. Ég er búin að vera að dæla í mig verkjalyfjum (sem ég geri annars sjaldan) út af hnénu (sem er annars allt í lagi nema stundum er það vont). Í fyrsta lagi þá var ég að hjálpa Sigrúnu vinkonu minni við að skrifa á borðkort (miða til að setja á borð) með nöfnum brúðargestanna. Ég skrifaði 22 vitlaus nöfn! (Áttaði mig reyndar á því áður en ég var búin að skila af mér), annars hefði sætaskipan orðið ansi fyndin held ég, allir að giska á sitt nafn.

Svo vorum við í sumarbústað með Borgari bróður og Elínu og þar gat ég ekki munað lengur en 2 mínútur hvað trompið var í spilinu sem við vorum að spila. Það lak allt út úr hausnum á mér og ég skíttapaði auðvitað. Ég þoli ekki að tapa.

Í gær var ég á fundi úti í bæ og var að labba með samstarfskonu minni út í bíl eftir fundinn. Mér sýndist hún taka upp lyklana að bílnum til að opna hann og í sömu mund blikkuðu ljós á bíl rétt hjá okkur. Ég labbaði að bílnum, opnaði hurðina og settist inn. Mundi samt ekkert eftir brauðpokanum sem var í framsætinu, var eiginlega viss um að hann hefði ekkert verið þarna áður. Þegar ég var í þessum pælingum (tók nú ekki nema 2 sekúndur) þá heyri ég "Hvaaa, hhvuuu, hveeer ERT ÞÚ??????????" Þetta var einhver eldgömul kona sem var ekkert lík samstarfskonunni minni! Ég var eins og asni og sagði "Ég heiti Sigrún" áður en ég rauk út úr bílnum, eldrauð í framan. Samstarfskona mín var þá komin að sínum bíl og fannst skrýtið að ég hefði týnst á ekki lengri leið. Svona er ég utan við mig he he.

Við erum annars búin að hafa það rosalega gott á Íslandi. Íbúðin sem við vorum í á Skólavörðustíg er frábær, kaffið sem við fengum á hverjum morgni í Kaffitár hefur verið brilliant. Ragga yfirleitt við stjórntækin þar. Við trítluðum á hverjum morgni af Skólavörðustíg með stírurnar í augunum, beint inn á Kaffitár þar sem ég fékk mér latte og Jóhannes espresso. Jóhannes var meira en sáttur við espressoinn sem hefur verið að koma úr vélunum þeirra enda afar góðir bollar frá Röggu.

Svo erum við búin að fá marga góða gesti í heimsókn, vorum með kökuboð í gær þar sem Jónsi og Auðun vinir okkar mættu og við borðuðum á okkur gat og höfðum það gott. Svo erum við búin að fá Sigrúnu (tengdó) og Þorvald, mömmu og pabba, Auðun, Elvu og Óla og fleiri. Voða fínt. Það er svo mikill munur að geta verið út af fyrir sig en ekki inni á öðrum í jólafríinu. Þó að fari vel um mann hjá öðrum þá getur maður kannski ekki boðið fólki í kaffi svona þegar manni sýnist. Eini gallinn við íbúðina er að hún er ekki nettengd en ég kemst þó alltaf í Netið í vinnunni sem er stutt frá. Svo er kannski ágætt að ég sé ekki að vinna heima á kvöldin, svona einu sinni (þýðir reyndar að ég verð lengur í vinnunni í staðinn :)

Það er nauðsynlegt að geta eldað mat og svoleiðis, verð crazy ef ég get ekki gert það í langan tíma. Við erum búin að elda fullt, þó að ofninn sé nú ekki til að hrópa húrra yfir. Á aðfangadag vorum við með aspassúpu og marineraðar nautalundir í forrétt. Í aðalrétt vorum við með hnetusteik, reyktan kalkún og meðlæti eins og sósu (úr soðinu), sætar kartöflur í ofni, kartöflumús með sólþurrkuðum tómötum, salat o.fl. Í eftirrétt vorum við með heimatilbúinn ís og konfekt (allt hollt að sjálfssögðu).

Af okkur er það annars að frétta að Jóhannes er að fara á Mt. Kenya í ferð með Elínu mágkonu (Mt.Kenya ferðin á www.afrika.is)

Ég fer víst lítið á fjöll núna en það er gott fyrir Jóhannes að skella sér, hann hefur gott af því strákurinn. Svo erum við að fara til Mombasa í Apríl og verðum þar í rúma viku. Það verður nóg að gera hjá okkur sem sagt.

Jæja það er best að byrja daginn. Við förum svo út til London á morgun svo það er síðasti séns fyrir kaffi ef einhver hefur áhuga á að hitta mig/okkur :)

Jæja langt síðan ég bloggaði síðast. Ekki mikið að frétta svo sem. Erum sem sagt komin á klakann sem ber nú aldeilis ekki nafn með rentu þessa dagana. Hvar er snjórinn eiginlega? Afhverju er rigning? Ætla rétt að vona að snjói allavega á Þorláksmessu.

Verðum með opið hús á Skólavörðustíg þar sem við bjóðum upp á óáfengt jólaglögg, smákökur, (heilsukökur og hinsegin líka), heitt súkkulaði, kaffi, te o.s.frv. Endilega kíkið og hlýið ykkur :) Það er gengið inn bakdyramegin. Sendið mér póst ef hringið í mig ef þið viljið nánari leiðbeiningar.

Við erum búin að kaupa jólamatinn, búin að pakka inn nánast öllum jólagjöfunum þannig að jólin mega fara að koma bara :) Erum reyndar að vinna eins og psychopatar en það er allt í lagi.

Veiiii eitt hundraðisti notandinn skráði sig á póstlistann minn í gær, vei vei vei. Til hamingju. Vildi að ég gæti boðið upp á ókeypis ferð til New York, svona gúrmet ferð en ég býð upp á hana í huganum með öllu tilheyrandi, fyrir 2, ímyndað 5 stjörnu hótel, ímyndaðan kvöldverð á einhverju æðislegu veitingahúsi og 100 þúsund fyrir hvorn til að eyða. Það vill svo til að ég veit hver notandinn er, í þessu tilviki Jónsi vinur hans Jóhannesar (það eru samt ekki bara vinir og kunningjar sem skrá sig sko, ekki halda það) :)

Þegar 10 þúsundasti notandinn skráir sig þá get ég sennilega boðið upp á alvöru ferð.