Bæklingaveikin

Ég er mjög veiklunda þegar kemur að bæklingum og helst þeim sem innihalda leikföng. Þegar ég var yngri komu Freemans og Sears vörulistarnir alltaf heim og ég fletti þeim þangað til blaðsíðurnar urðu gegnsæar. Sérstaklega lá ég yfir leikfangasíðunum en annars gat ég skoðað listana spjaldanna á milli, hvort sem á blaðsíðunum voru garðyrkjuáhöld, pennasett, gullkeðjur eða nefháraklippur. Mér fannst allt flott og langaði í allar vörurnar. Ég hugsaði oft að ef ég væri ótrúlega rík myndi ég hringja í eigendur fyrirtækjanna og biðja um allt í bæklingnum og fá vörurnar bara sendar heim. Ég væri kannski aðeins vandari í vali í dag en þegar inn á borð berast leikfangabæklingar eins og jólabæklingurinn frá Early Learning Centre, verð ég sambandslaus í nokkrar klukkustundir. Ég get dottið í svona bækling og orðið 5 ára eða 10 ára aftur. Mig langar í ALLT, hvort sem það er Bosch eldhússamstæða eins og á myndinni hér fyrir ofan (þeir eru líka með samstæður frá Miele, auðvitað), espressovél eins og á myndinni hér fyrir neðan (ok ég veit hvað Afkvæmið fær í jólagjöf eftir nokkur ár), bensínstöð, innkaupakerra, dúkkuvagn eða kubbar. Mig langar svo að hringja í eiganda Early Learning Centre og biðja um allt í bæklingnum takk og fá vörurnar sendar heim. Ég myndi opna hvern pakkann með bros á vör og vera reglulega glöð (ég myndi svo gefa leikföngin til þeirra sem þyrftu þau meira en ég). Mig langar að eiga peninga til að geta gert svona hluti en á meðan ég á þá alls ekki verð ég bara að skoða bæklinginn og hugsa um leikföngin sem t.d. börnin í afrísku þorpunum sem ég hef heimsótt leika sér með. Þau eru yfirleitt gerð úr snærum og plasti eða skorin út úr tré. Stundum skoppa börnin gjarðir alsæl. Þau hafa engar eldhússamstæður né espressovélar, blikkandi dót né dót með hljóðum ..…..en þetta dót er bara svo ósköp undur fallegt og skemmtilegt og hvern langar ekki í falleg leikföng? Ef ég vinn í breska lottóinu veit ég upp á hár hvað fyrsta verkið mitt verður..

Myndirnar hér að ofan eru af vef Early Learning Centre.