Hollustukóngar

Ég hef verið að hugsa um það síðustu daga og síðustu 3 vikur hversu auðvelt það hlýtur að vera fyrir fólk sem er í einhvers konar lífstílsbreytingum/aðhaldi, að detta í rugl þegar lífsstíllinn breytist. Ég hef svo sem oft hugsað þetta líka  á ferðalögum. Á þessum ótal ferðum okkar til Afríku hefði nefnilega verið afskaplega auðvelt að "detta í rugl" þ.e. borða óhollt. Ekki það að maturinn í t.d. Austur-Afríku sé óhollur...venjulegur heimilismatur saman stendur af baunum, grænmeti, kartöflum o.fl. Það eru hins vegar hótelin og gististaðirnir sem bjóða upp á ruglið (ef maður er ekki að gista á stöðum sem innfæddir sækja). Þess vegna er ég afar, afar passasöm með það sem ég tek með mér svo ég detti ekki í hvítt brauð og pasta bara af því ekkert annað er til. Ég borða reyndar mikið af salötum hvers konar á ferðalögum og ég er alltaf með hnetur og rúsínur í poka ásamt heimatilbúnum orkustöngum o.þ.h. Svo lifi ég á ávöxtum heilu dagana og hef gott af enda svo hollir svona beint af trjánum. Ég veit að það er fáránlegt að vera að hugsa um hvítt pasta og brauð á meðan fólk í þessum heimshluta á varla fyrir mat en ef ég hef val, nýti ég mér það en hef alltaf hitt á bak við eyrað svo ég fái ekki samviskubit dauðans.

Ég var að velta þessu fyrir mér því óneitanlega er lítið barn tímaþjófur.....og ef ég hefði ekki verið ofur skipulögð áður en það mætti í heiminn, væri ég líklega búin að styrkja helstu grænmetisstaðina í nágrenninu umtalsvert. Það er bara ekki hollt til lengdar (of margar hitaeiningar) að borða slíkan mat þó hann sé ægilega góður. Ég nefnilega lærði það þegar ég var í hnéaðgerðunum fyrir fjórum árum og svo þessum tveimur fyrir rúmu ári að það væri sniðugt að útbúa CafeSigrun frystihólf þar sem alltaf væri til eitthvað gott í matinn. Ég lá á spítala í tvær nætur fyrir ári síðan og var ekki rólfær í marga daga. Ég gat ekki hugsað mér að svelta aumingja Jóhannes (sem hefði annars gert sér Cheerios að góðu). Ég var því búin að útbúa alls kyns hollan kvöldmat í neytendaumbúðum...t.d. fylltar paprikur, crepes (fylltar pönnukökur), súpur, borritos, mini-pizzur o.fl. Í frystihólfinu var líka alls kyns góðgæti eins og muffinsar, orkustangir, konfekt, ís og fleira. Það sama á við þessa dagana. Þetta er nefnilega allt spurning um gott skipulag. Ég hafði 9 mánuði til að undirbúa það að við þyrftum ekki að borða óhollt núna svo það er ekki eins og ég hafi haft einhverja afsökun. Það kom á daginn að þetta reyndist vera góð hugmynd því síðustu vikur erum við búin að lifa eins og kóngar (hollustukóngar) og borða fullt upp úr CafeSigrun frystihólfinu.

Punkturinn hjá mér er sem sagt að það er ENGIN afsökun fyrir því að borða óhollt og detta í sukk af því maður "hafi ekki tíma". Þetta er ekkert flókið. Maður hefur alltaf tíma fyrir hollustu og ef hann er af skornum skammti, hliðrar maður öðru til svo að það sé pottþétt eitthvað gott, og hollt að borða, ávallt.