Rislausar bollurRislausar bollur
19 ummæli
Málið er. Ef ég nota allan þennan vökva eins og gefið er upp í venjulegum uppskriftum, leka bollurnar í eina sæng á bökunarplötunni. Svo ég verð að minnka vökvann. Ég minnkaði hann um helming og það var samt ekki nóg. Ég jók við fitumagnið (mjög óvenjulegt að ég geri svo) því í sumum uppskriftum sé ég allt að 10 sinnum meiri fitu en ég nota og það var samt ekki nóg. Ég notaði fleiri egg, færri egg, minna mjöl, meira mjöl, minna vatn, meira vatn. Það skipti ekki rass í bala neinu máli.
Uppskriftin að vatnsdeigsbollunum sem ég birti að lokum er svona eins nálægt því og hægt var að komast en bollurnar rísa samt ekki. HVAÐ er ég að gera vitlaust. Ég meira að segja prófaði að fylgja einni uppskrift í þaula í upphafi, til að prófa mig áfram og fá tilfinninguna fyrir þessu. Það gekk ekki og ég endaði með bolludagspizzu (flatböku). Vökvamagnið var fáránlega mikið miðað við þetta litla mjöl sem gefið var upp.
Ég sigta mjölið, hræri þangað til allt er kekkjalaust, sýð saman vatn og kókosolíu, hræri egg varlega, hræri vel í deiginu eftir að eggið er komið út í o.s.frv., o.s.frv. Er þetta vegna þess að ég nota gróft spelti (það rís í öllum öðrum uppskriftum sem ég geri svo það ætti ekki að skipta öllu....)? Ég hef notað spelti (gróft) í allt sem ég hef bakað síðustu 7 árin og aldrei hefur það brugðist. Ég meira að segja notaði kartöflumjöl til að fá bollurnar aðeins meðfærilegri (finnst það koma líka betur út bara upp á bragðið að gera)....en nei, í mótþróa liggja þær nánast marflatar. Update: Ég kæli deigið vel áður en eggið fer í það og opna ofninn ekki fyrstu 20 mínúturnar bara svo það komi fram líka.
Hvernig í andsk..... farið þið að því að nota allt þetta vökvamagn (t.d. 2 egg, 2 dl vatn og 170 gr af smjöri) á meðan ég nota minna en helminginn af þessu og þær leka samt? Ég hef prófað með 2 eggjum, 2 dl af vatni (og minna af kókosolíu reyndar) og þær lágu, eins og ég segi, marflatar í einni sæng.
Það merkilegast við þetta er að glúteinlausu vatnsdeigsbollurnar voru bæði betri á bragðið og risu betur en svipað hlutfall var af mjöli, vatni vs. olíu. Myndin hér að ofan er einmitt af þessum glúteinlausu.
Ég biðla til húsmæðra og húsfeðra og annarra. Hver er galdurinn? HVERNIG fær maður bollur eins og maður sér í bakaríum og svoleiðis, þið vitið þessar ljótu, grófu, púffuðu vatnsdeigsbollur? HVERNIG?
Öll ráð eru vel þegin.
Ummæli
21. feb. 2009
það er ekki gott að opna ofninn fystu minutur og hafa kannski meiri hita en sagt er til um. kv m
21. feb. 2009
Baka við 180°C og opna ekki ofninn fyrstu 20 mínúturnar.
21. feb. 2009
Passarðu að láta deigið kólna vel áður en þú setur eggin útí?
(ég feilaði alltaf á því) svo er náttúrulega miklu betra að hafa þær glúteinlausar.
Gangi okkur öllum vel við bollubaksturinn ;-)
21. feb. 2009
Jebb deigið kólnar alveg áður en ég set eggið út í.....
21. feb. 2009
Er ekki bara málið að vera ekkert að baka bollur? ;-)
21. feb. 2009
He he....jú myndi líklega ekki gera það nema af því ég fékk fyrirspurn frá notanda vefjarins varðandi uppskrift :)
22. feb. 2009
Mamma segir að það megi ALLS EKKI opna opinn fyrstu 12-15 mínúturnar..
mínar vatnsdeigsbollur voru alltaf flatar en þegar ég fór eftir mömmuráði þá hepnnuðust þær :)
125 g smjörlíki
2,5 dl vatn
125 g sigtað hveiti
4 meðalstór egg ALLS EKKI stór/mjög stór
Sjóða saman smjörlíki og vatn, Hræra sáldruðu hveiti öllu í einu út í . taka pott af og láta kólna smá (bara í svona 3-5 mín)
Slá saman eggjum í skál og setja eggin í bolluna smátt og smátt í einu á minnsta hraða með þeytara.
setja rétt fyrir neðan miðju á 200. ALLS EKKI OPNA OFNINN FYRSTU 12-15 MÍN
Gefur 24-28 meðalstórar kökur
30-40 litlar :)
22. feb. 2009
Takk Sigrún fyrir upplýsingarnar...ég reyndar opna ekki ofninn fyrstu 20 mínúturnar svo það er ekki það.
Ég nota aldrei smjör eða smjörlíki sem gerir þetta aðeins flóknara...Ég er búin að prófa allt og ég meina allt, annað (mun auðvitað aldrei prófa með smjörlíki svo ég verð að halda áfram tilraunum)....þessar glúteinlausu heppnuðust þó vel...sem ég skil ekki alveg. Það eina sem ég á eftir að prófa í hinum er fínt spelti, hef alltaf notað gróft.
22. feb. 2009
en að prófa eina uppskrift með venjulegu smjörlíki til að útiloka ofninn og þig hehe :)
22. feb. 2009
He he.....mig grunar að þetta sé sambland af skorti á smjörlíki og fleiri þáttum....það þýðir samt ekki að gefast upp :)
22. feb. 2009
neiiii, það þýðir ekki :)
borðaru sojamjöl ? en að prófa það ?
22. feb. 2009
Ertu nokkuð að baka með blæstri.. Veit það virkar ekki, allt flatt og ónýtt.. bara gamla góða undir/yfir hiti.
22. feb. 2009
Hmmmm blásturslaus ofn og sojamjöl.....þarf að kaupa fleiri egg..... :)
22. feb. 2009
Ég prófaði uppskriftina þína-þurfti að bæta eggjum en setti ekki agave, hef aldrei sett sætt í vatnsdeigsbollur og gróft spelt hef ég notað eingöngu. Ég set eggin alltaf útí heita soppuna og hræri þau í með handþeytara til að fá deigið nógu létt. Þetta virkaði ágætlega. Allir ánægðir hér og taka tvö verður tekin á eftir.
22. feb. 2009
Stína....mjög áhugavert...kannski að ég ætti að sleppa agavesírópinu og prófa að nota meira af eggjum í staðinn.....það gæti virkað....Risu þær ok, notaðirðu kartöflumjöl eða bara gróft spelti?
23. feb. 2009
Hæ hæ... ég á hér tvær uppskriftir af vatnsdeigsbollum með spelti. Ég er búin að prófa efri uppskriftina og hún kom vel út. Mér datt í hug að það væri e.t.v. eitthvað í þeim sem þú gætir nýtt þér varðandi risvandamálið hehe :) Annars líst mér svo vel á bollurnar þínar að ég ætla að prófa þær á eftir, ég er viss um að þær eru alveg voðalega góðar :)
Vatnsdeigsbollur úr spelti (Inga Kristjáns)
2 dl. vatn
1 ½ matsk. extra virgin ólífuolía
100 gr. fínt (sigtað) spelt
2 stór egg (3 lítil)
Sjóðið saman í potti, vatn og olíu. Takið pottinn af hitanum og hrærið speltinu út í (hrærið kröftuglega). Setjið pottinn aftur yfir hitann og hrærið deigið saman þar til það hefur fengið mjúka áferð. Kælið pottinn með deiginu í (t.d. í vatnsbaði). Hrærið eggin saman og bætið þeim smám saman út í kalt deigið og hrærið á meðan með handþeytara. Hrærið deigið vel eftir að eggjunum hefur verið bætt útí. Hitið ofninn í 200°. Setjið bökunarpappír á plötu, búið til ca 9 bollur úr deiginu og bakið í miðjum ofni. Opnið ekki ofnhurðina fyrstu 20 mín. Bakist í 30 mín. við 200°
Bolludagsbollur - einfaldar og fljótlegar (Solla)
2 dl gróft spelt
2 ½ dl fíntmalað spelt
1 msk vínsteinslyftiduft
½ dl agavesýróp
1 ½ dl heitt vatn
Hrærið þurrefnunum saman í skál, hellið agavesýrópinu útá ásamt vatninu og klárið að blanda deigið. Best er að blanda deigið saman, ekki að hræra það of mikið. Þetta á að minna á hnausþykkan hafragraut. Hitið ofninn í 180°C – setjið bökunarpappír á ofnskúffu, notið ískúluskeið við að móta bollurnar. Bakið í um 20 mín. Setjið bollurnar inn í viskustykki á meðan þær eru að kólna.
23. feb. 2009
Sæl Inga og takk fyrir uppskriftirnar. Ég prófaði þessi hlutföll eins og eru í þínum (efri) um daginn og þær urðu marflatar (aftur sama vandamálið með of mikið vatn vs. þurru mjöli). Ég á samt eftir að prófa með fínu spelti.
Hin uppskriftin frá Sollu er eiginlega bara brauðuppskrift :( Hentar vel þeim sem hafa eggjaóþol en eru að öðru leyti eins og brauðbollur.
Takk
S.
24. feb. 2009
Mamma sagði mér bara að passa að þeyta eggin mjög vel saman við, þá yrði deigið ekki jafn þunnt. Sé að bollurnar hafa loks tekist, hljómar einmitt lyftivænna að hafa fína speltið. ummmmm
24. feb. 2009
Hæ
Setti helminginn af kartöflumjölinu, bætti grófu spelti í staðinn. Baka vatnsdeig með blæstri á ca 180c- það lyftist samt og verður holt innan. Prófaði gluteinlausu bollurnar líka og bætti eggi í staðinn fyrir agave og fékk fínar bollur. Takk fyrir uppskriftirnar. Kv. Stína