Bloggið

Tómatsúpa Höddu

Var að setja nýja mynd inn fyrir tómatsúpu Höddu :) Súpan er alltaf jafn góð!!!

Grjónagrautur

Hæ hó. Ég er búin að liggja í dvala. Eða eiginlega, öllu heldur er ég búin að vera á milljón og hefur þessi hluti lífs míns setið á hakanum. Eins og mér þykir gaman að skrifa og elda og skrifa og elda og skrifa og elda.....þá gagnast það víst lítið í klínískri sálfræði. Til einkunnar meina ég...að tala um mat þegar maður á að vera að hugsa um geðklofarófsraskanir og áráttu- og þráhyggju og svoleiðis. Ég er orðin hálfur klínískur barnasálfræðingur. Pælið í því! Það finnst mér magnað því mér finnst ég bara nýbúin með MSc námið í heilsusálfræði. Enda er bara eitt ár síðan við fluttum hingað til Íslands og ég kláraði námið í nóvember síðastliðinn á meðan ég var að byrja í klínísku sálfræðinni. Svo það hefur verið nóg að gera með 2ja og 4ra ára lítil kríli sem eru farin að segja við hvort annað í leik „heyrðu nei ég er bara upptekin núna og get því miður ekki leikið við þig...ég er nefnilega að fara í próf”. Úff það var strembið að heyra. En þessi börnum er ekki hægt að vorkenna...það er verri vanræksla til heldur að móðirin afli sér frekari menntunar. Svo hefur pabbi þeirra verið á við 20 manns og ég hefði aldrei getað þetta án hans. Svo ég skulda honum 8,436 smákökur.

En nóg um það. Ég var að setja inn nýja mynd af grjónagrautinum góða ásamt uppfærðri uppskrift þar sem pottinum er pakkað inn í handklæði. Það er eina vitið við að elda grjónagraut.

En fyrir ykkur sem eruð á Twitter, Facebook og Instagram þá er ég þar líka ef þið viljið finna mig!

Árið 2014 er að ganga í garð og í fljótu bragði fannst mér ekki eins og ég hefði gert neitt af viti.....en fór svo að hugsa aðeins. Í grófum dráttum gerði ég (og fjölskyldan) þetta:

• Fórum til Disneyland (ég er algjör sökker fyrir Disneyland.....Ég veit, ég veit). Hef farið þangað 3var og 2var án barna þegar Jóhannes var með 35% afslátt af öllu m.a. hótelum og varningi af því hann var að vinna hjá Disney....Það var reglulega gaman að fara með fjölskyldunni (auk mágkonu og tengdamömmu).
• Við héldum jólin í fyrsta skipti í London frá árinu 2001. Það var bæði skrýtið og dásamlegt í senn. Það var skrýtið að vera svona langt frá öllu og öllum en á sama tíma dásamlegt að geta bara verið í náttfötunum meira og minna um öll jólin og farið á þau milljón frábæru kaffihús sem voru í nágrenni við okkur.
• Fjölskyldan flutti til Íslands frá London eftir um það bil 10 ára veru (ekki samfellda). Þriðja skiptið sem við flytjum út og til Íslands aftur. Það tekur yfirleitt um 2 ár (fjárhagslega og andlega) að jafna sig á flutningum til Íslands. Ég græt pínulítið inni í mér á hverjum degi en reyni að vera bjartsýn og jákvæð barnanna vegna. Þau eru að elska Ísland og leikskólann sinn og það skiptir öllu. Veðrið er hins vegar að ganga frá mér og skammdegið. Ekki vegna einhvers óyndis, heldur vegna þess að ég get engar fjandans myndir tekið af mat. Það er myrkur fram til hádegis og svo er smá ljósglæta til klukkan 14, rétt svo að maður sjái út um gluggann...en svo kemur myrkrið bara 5 mínútum síðar. Fáránlegt. Ég sakna líka langa haustsins og langa vorsins í London. Á Íslandi er bara langt haust og svo vetur.
• Ég lauk Mastersgráðu í heilsusálfræði við University of Westminster....og get með góðri samvisku sagt að ég hafi lokið henni með stæl.
• Ég fékk inngöngu í klínísku sálfræðina við Háskóla Íslands. Sem aftur þýðir að ég er ekki eins dugleg og ég vildi hvað CafeSigrun varðar en verð þeim mun duglegri í sumar með meiri birtu og meiri tíma.
• Ég eignaðist Vitamix og Magimix 5200XL. Er mjög ánægð með Vitamix-inn en síður ánægð með Magimix-inn...eða við skulum frekar segja að vélin og hnífurinn sé í úrvalsflokki en skálarnar D.R.A.S.L. Nánar um það síðar.
• Gerði uppskrift að súkkulaðiköku sem er hrá og þannig að fólk fær aðsvif úr hamingju við að borða hana. Hún verður opinberuð síðar við gott tækifæri.
• Eignaðist Excalibur þurrkofn fyrir hráfæði og er að byrja að nota hann núna með meira plássi. Hafði notað hann bara pínulítið í London sökum plássleysis en núna þurrka ég allt. Það má meira að segja þurrka tómatsúpu og jógúrt...(ok kannski tilgangslaust en möguleikinn er fyrir hendi).
• Fór milljón sinnum út að borða í London...og borðaði líbanskan (nánar tiltekið beirútskan) mat, thailenskan, japanskan (fuuuullllt af sushi), ítalskan og fullt af hráfæði og öðru góðgæti. Staðirnir sem stóðu upp úr voru ROKA og Ottolenghi.
• Var í fullt af viðtölum í einhverjum blöðum hér og þar og missti töluna um miðbik ársins....
• Bakaði og eldaði alveg heilan helling með börnunum á árinu. Eiginlega á hverjum degi þegar ég var í London og var aðeins með dagvistun hálfan daginn. Það verður minna þannig að mig langi að stinga mér ofan í blandarann og kveikja og meira þannig að þetta sé eitthvað sem mig langar til að halda áfram að gera. Svo þið sem eruð með svona ung börn (2ja og 4ra)....ekki gefast upp og skipuleggið baksturinn vel (hafið allt tilbúið, hver með sitt verkefni o.s.frv). Reyndar er ekkert mál að baka með einu barni, sérstaklega yfir 3ja ára (svona að öllu jöfnu) en 2ja og 4ra ára saman (og bæði með sama einbeitta brotaviljann)....guð.minn.góður).

Árið 2014 verður spennandi og vonandi með meiri ferðalögum. Jóhannes er reyndar að byrja árið með því að leiða ferðahóp upp á Kilimanjaro í annað skiptið. Við fyrsta tækifæri munum við ferðast meira saman. Hef grun um að ljóta eldhúsinnréttingin verði þangað til við verðum elliær því ferðalög munu líklega alltaf hafa forgang. En ég gæti hugsað mér verri notkun á peningum.

Gleðilegt nýtt ár og takk fyrir 2103!!!

Ég er orðin ¼ sálfræðingur. Nú eru afstaðnar 216 kennslustundir, 10 próf, 6 skýrslur/skilagreinar, 11 ritgerðir og önnur verkefni og 2 nemendafyrirlestrar og fyrir utan um 640 stundir (ekki minna en það en veitti ekki af) í lærdóm fyrir þessa önn. Allt þetta á þremur mánuðum. Það er alveg hægt að segja að ég hafi verið í meira lagi upptekin að undanförnu. En núna á ég einungis tvö verkefni eftir og svo ætla ég að demba mér í jólaundirbúning og bakstur og gera eitthvað skemmtilegt með börnunum sem halda að tölvan sé gróin föst við andlitið á mér. Sérstök heiðurs- og þolinmæðisverðlaun fara til Jóhannesar sem hefur verið í öllum hlutverkum heimilisins og staðið sig með sóma (en ég hef reyndar komist að því að salatgerð er ekki hans sterkasta hlið í matargerð. Okkur greinir verulega á um hvernig salat þurfi að vera til að vera gott). Ég hefði ekki einu sinni reynt þetta án hans. Og samnemendur mínir gera námið líka skemmtilegt, allt saman góðir krakkar. Þau láta mig allavega ekki finna fyrir því að ég sé risaeðlan í hópnum.

Og já svo útskrifaðist ég úr MSc í heilsusálfræði fyrir um viku síðan. En ég steingleymdi því, var bara að læra eins og venjulega og svo allt í einu poppaði upp áminning í tölvunni um að útskriftin væri eftir klukkutíma. Og það var pínulítið sorgleg stund….að gleyma útskriftinni sinni. En ekki mikið við því að gera þar sem ég var jú á Íslandi en útskriftin í London. Ég var hrikalega ánægð með að fá distinction fyrir MSc gráðuna. Við vorum tvær í bekknum sem fengum distinction og sú sem líka fékk hana er bresk í húð og hár. Það hefði verið gaman að vera í athöfninni með asnalegan hatt og skikkjuklædd eins og Harry Potter (bara til að geta hallæris-instagramað myndina). Mér þótti reglulega vænt um það að allt sem ég lagði á mig og okkur hefði skilað sér. Og aftur hefði ég ekki reynt þetta án Jóhannesar, né án Sigríðar (leigubílsstjóra og tréútskurðarmeistara) sem var hjónabandsbjargarinn okkar (hún passaði yngra eintakið þegar ég var í skólanum og hann ekki á leikskóla og sá til þess að ég missti ekki vitið. Og var einstaklega skemmtilegur félagsskapur líka). Ég er svo heppin að þekkja gott fólk, vera umvafin góðu fólki alla daga og endalaust heppin með að fjölskyldan styður mig í því sem ég er að gera.  

En núna er skafrenningur og myrkur og þegar mesta stressið er búið í skólanum (þegar ég hætti að greiða mér með tannburstanum og farin að muna hvað börnin mín heita. Það kom í alvörunni fyrir að ég gleymdi því eitt skiptið í leikskólanum) fer ég að hugsa til London og hversu mikið ég sakna jóla-London. Það fór hrikalega vel um okkur síðustu jólin þar. Það borgar sig ekki að hugsa of mikið um það samt heldu einbeita sér að því sem er gott við Ísland (ekki hafa eftir mér „að leita að nál í heystakki”). Og þetta verða undarleg jól. Einn bróðir búsettur í Kenya ásamt megninu af fjölskyldunni, annar bróðir búsettur í Danmörku ásamt fjölskyldunni og einn bróðir búsettur í Belgíu (eða Saudi Ariabiu) og börnin og hinn hluti fjölskyldunnar (fyrrverandi eiginkona og drengir) í Englandi. Þetta verða líklega Skype jólin miklu 2013!