Leiðinlegu grænmetisæturnar

Það er ekki oft sem ég hef tíma til að lesa blöðin en ég var slöpp í gær og ákvað að  skoða blöðin á Netinu þegar ég kom heim úr vinnunni. Ég skoðaði 24 stundir og mig rak í rogastans á blaðsíðu 36. Þar er Kolbrún Bergþórsdóttir að tala um hollustu og óhollustu, að það sé hættulegt samkvæmt nýjustu fréttum að borða franskar, drekka kók o.s.frv. og að hún þurfi að taka sig saman í andlitinu ble ble.

Einnig stóð þetta orðrétt:

...Sjálfsagt er hægt að snúa vondri þróun við og snúa sér að gulrætum [innslag frá mér...ætti það ekki að vera gulrótum?] og spínati. Meinið er að grænmeti er ákaflega "óinteressant" fæða. Enda eru grænmetisætur með leiðinlegra fólki sem maður hittir.

Nokkur atriði:

• Þekkir hún allar grænmetisætur í heiminum?
• Er allur matur úr grænmeti "óeinteressant"?
• Hefur hún prófað allan matinn á þeim frábæru stöðum Grænum kosti og Á næstu grösum svo dæmi sé tekið.
• Er hún að rugla saman hráum gulrótum og gulrótarbuffi með girnilegri sósu? Ekki sami hluturinn.
• Fólk gerist ekki alltaf grænmetisætur að eigin vali þ.e. stundum þarf fólk að borða bara grænmeti vegna þess að það hefur óþol fyrir kjöti, þarf að missa þyngd, hefur verið ráðlagt slíkt af læknum o.s.frv.
• Sumir borða grænmeti hreinlega af því þeir hafa ekki lyst á kjöti og finnst aðbúnaður dýra hreint út sagt ömurlegur (ég er í þeim flokki).
• Það kemur engum við hver borðar hvað og hvernig. Ég blammera ekki kjötætur í fjölmiðlum (ég blammera aðbúnað dýra hins vegar) og mér myndi aldrei detta það til hugar.
• Það er óþolandi að fólk sem er að byrja að stíga sín fyrstu skref í átt til hollara fæðis þurfi að lenda í svona óþolandi yfirlýsingu.

Ég þoli ekki fordóma af neinu tagi. Þessi "ummæli" eru í besta falli fáfræði og heimska, í versta falli fordómar og dónaskapur við þá sem kjósa ekki sama lífstíl og hinir eða þurfa einhverra hluta vegna að vera grænmetisætur. Það geta verið milljón ástæður.

Ef þessi kona (sem er þetta þekkt) hefði viðhaft sömu ummæli t.d. í breskum fjölmiðlum hefði hún verið krossfest af hinum ýmsu samtökum. Hún hefði verið knúin til að biðjast afsökunar yfir einstaklega heimskulegum ummælum með skottið á milli fótanna. Það hefðu verið umræður í sjónvarpi, umræður í blöðum. Í hvert skipti sem talað væri um grænmetisætur og aðför að þeim hefði birst mynd af henni. Ég þoli ekki að hér á landi komist fólk upp með að segja allan fjandann. Hvernig DIRFIST hún að ráðast á heilan hóp fólks (sem telur milljónir manna) og dæma það í einu lagi. Ég þekki hundleiðinlegar kjötætur og hundleiðinlegar grænmetisætur. Ég þekki líka skemmtilegar kjötætur og skemmtilegar grænmetisætur. Í guðanna bænum kona hugsaðu áður en þú setur eitthvað svona á blað.